Вазири корҳои дохилии ҷумҳурӣ Рамазон Раҳимов зимни нишасти хабарии имрӯза дар робита ба амалиёти махсуси Хоруғ изҳор намуд, ки он натиҷаи беамалиии мақомоти интизомии минтақа буд.

Тибқи суханони ӯ, дар давоми солҳои зиёд мақомоти интизомӣ аз уҳдаи пешгирӣ ва мубориза бо ҷинояткорӣ дар минтақа баромада наметавонистанд, ки дар натиҷа дар Хоруғ гурӯҳҳои ҷиноятпеша амал карда, генерали хадамоти махсус Абдулло Назаров кушта шуд.

«Аз ин рӯ, ба роҳандозии амалиёти махсус маҷбур шудем ва дар ВМКБ танҳо тайи як сол 722 адад силоҳи оташфишон мусодира гардид, ки нишондиҳандаи хеле назаррас аст», - зикр кард Раҳимов.

Ӯ ҳамчунин изҳор кард, ки шахсан дар амалиёти махсус иштирок карда, муддати се моҳ дар Хоруғ қарор доштааст. «Дар ин муддат корҳои зиёде ба иҷро расида, барои камбудиҳо чанде аз кормандони мақомоти интизомӣ аз мансаб сабукдӯш ва баъзе ба ҷавобгарии ҷиноӣ кашида шуданд. Агар шумори ҳайати шахсии Раёсати ВКД дар ВМКБ қаблан 240 нафар кормандон ва шуъбаи ВКД дар шаҳри Хоруғ 82 нафар кормандонро ташкил медод, айни замон ҳайати шахсии раёсати вилоятӣ ба андозаи 40% ихтисор шуда, аз ин ҳисоб шуъбаи корҳои дохилии шаҳри Хоруғ пурзӯртар карда шуд», - гуфт вазир.

Вазири корҳои дохилии ҷумҳурӣ ҳамчунин илова намуд, ки корҳои тақсимоти кадрҳо дар шӯъбаи шаҳри Хоруғ то ҳол идома доранд.

Бино ба маълумоти ВКД, соли гузашта дар Тоҷикистон 1 ҳазору 390 адад силоҳи оташфишон, аз ҷумла 239 адад автомат, 466 адади яроқи суфтамил ва дигар аслиҳаву муҳимот мусодира шудааст.