Ба баргузор намудани як чорабинӣ бахшида ба мавлуди Паёмбар Муҳамммад (с) дар қароргоҳи Ҳизби наҳзати исломии Тоҷикистон дар Кӯлоб кормандони мақомоти маҳаллии милиса дахолат карданд.

Тавре ба ОИ «Азия-Плюс» муовини раиси ҲНИТ Муҳаммадалии Ҳайит хабар дод, ин амали худро кормандони милиса бо он шарҳ додаанд, ки чорабинӣ бидуни мувофиқа бо мақомоти маҳаллии ҳокимияти давлатӣ созмон дода шудааст.

«Аз рӯи ин далел раиси бахши ҲНИТ дар шаҳри Кӯлоб Абдусамади Ғайрат ба шуъбаи милиса даъват шуда, пас аз додани баёнот ӯро ҷавоб додаанд», - зикр кард М.Ҳайит.

Ба қавли муовини раиси ҲНИТ, кормандони милиса далел овардаанд, ки мувофиқи қонун «Дар бораи танзими анъана ва ҷашну маросимҳо дар ҶТ», баргузор намудани чорабиниҳо бахшида ба мавлуди Паёмбар Муҳаммад (с) дар кишвар манъ аст.

«Бахшида ба мавлуди Паёмбар Муҳаммад (с) ҲНИТ дар саросари кишвар чорабиниҳо доир менамояд ва дар ҳеҷ ҷое ба ин монеъа эҷод намесозанд, ба ҷуз ҳукуматдорони шаҳри Кӯлоб. Имрӯз бахши ҲНИТ дар шаҳри Кӯлоб ният дорад, ки аз болои амали кормандони милиса ба прокуратураи шаҳр шикоят барад», - афзуд номбурда.