Дар ноҳияи Исфара гумонбарони ду ҳодисаи куштори дар соли равон рухдода боздошт шуданд.

Тавре ба ОИ «Азия-Плюс» аз Раёсати ВКД ҶТ дар вилояти Суғд хабар доданд, рӯзи якшанбеи ҳафтаи гузашта гумонбар ба қатли Баҳромиддин Аҳмедов, сокини 43-солаи ҷамоати Навгилем, сокини 53-солаи ҷамоати Шӯроб Убайдулло Ҳомидов боздошт шудааст, ки дар ҳолати мастӣ ба куштор даст зада, сипас ҷасадро ба ҷӯйбор партофта буд.

Ба иттилои манбаъ, ҳодисаи дуюм рӯзи 15-уми март дар шаҳри Исфара рух дода, нимашаб дар истгоҳи автомашинаҳои воқеъ дар кӯчаи Баҳори шаҳри Исфара ҷасади сокини 40-солаи ҷамоати Фондарёи ноҳияи Айнӣ Обид Обидов бо ҷароҳатҳои зиёд аз зарбаи корд дарёфт шуда буд. Ба гумони даст доштан дар ин куштор сокини 34-солаи шаҳри Исфара Рустам  Асророви қаблан се маротиба маҳкумшуда боздошт шудааст.

Зимнан зикр гардид, ки аз рӯйи ин ҳодисаҳо мутобиқи моддаи 104, қ. 2-и КҶ ҶТ (Одамкушӣ) парвандаҳои ҷиноӣ боз шуда, тафтишот идома дорад.

Бино ба маълумоти Раёсати ВКД ҶТ дар вилояти Суғд, соли гузашта дар қаламрави шаҳру навоҳии минтақаи шимоли кишвар 38 далели одамкушӣ (соли 2011 – 41 далел) ба қайд гирифта шудааст.