Кормандони Раёсати Кумитаи давлатии амнияти миллии ҶТ дар гурӯҳи ноҳияҳои водии Рашт як миқдор силоҳ, лавозимоти ҷангӣ ва маводи мухаддирро мусодира намуданд.

Тавре ба ОИ «Азия-Плюс»аз маркази робита бо ҷомеаи КДАМ ҶТ хабар доданд, ба гумони нигоҳдории ғайриқонунии силоҳ, лавозимоти ҷангӣ ва маводи нашъаовар сокини 34-солаи ноҳияи Рашт Абдулҳамид Шоҳиҷангов ва сокини 28-солаи шаҳри Душанбе Искандар Замонов боздошт шудаанд.

«Зимни азназаргузаронии манзили зисти Шоҳиҷангов таппончаи Макаров бо 3 тирдон, 66 дона тир, 4 дона норинҷаки дастии РГД-5 ва як миқдор маводи мухаддири ҳашиш дарёфт ва мусодира карда шуд», - гуфт манбаъ.

Зимнан зикр гардид, ки феълан аз рӯйи ин далел парвандаи ҷиноӣ боз гардида, тафтишоти пешакӣ ҷараён дорад.