Маълумоти нашршуда дар васоити ахбори умуми ҷумҳурӣ оид ба гуруснанишинӣ эълон кардани маҳбуси муассисаи ислоҳии ЯТ 9/7 дар шаҳри Қӯрғонтеппа Абдуғаффор Раҳмонов асоси воқеӣ надорад.

Муфаттиши прокуратураи махсус оид ба назорат аз болои иҷрои қонунҳо дар муассисаҳои ислоҳии вилояти Хатлон Давлат Тағоев дар суҳбат бо хабарнигори ОИ «Азия-Плюс» дар ин робита изҳор намуд, ки зимни санҷиши ин маълумот, бо маҳбуси зикраш дар боло рафта вохӯрда, ӯ изҳор намудааст, ки ҳеҷ гоҳ гуруснанишинӣ эълон накардааст ва ҳангоми суҳбат бо онҳо бо шириниҳо чой нӯшидааст.

«Муовини сардори муассисаи ислоҳии мазкур Искандар Исматов, ки чанде қабл ба ин вазифа таъин шуд, дар доираи қонун санҷиш гузаронида, аз якчанд нафар маҳбусон телефони ҳамроҳашонро гирифтааст ва ин боис шудааст, ки чанде аз онҳо ба ВАО маълумоти бардурӯғ диҳанд», - иброз дошт вай.

Ба гуфтаи ҳамсуҳбат, прокуратураи махсус оид ба назорат аз болои иҷрои қонунҳо муддати ҳар 10 рӯз оид ба сифати маҳсулоти ғизойӣ, вазъи санитарии ҳуҷраҳо, шароити будубош ва реҷаи сайругашти маҳбусон санҷишҳо баргузор намуда, бо онҳо суҳбатҳои инфиродӣ доир менамояд ва дар суҳбати чанде қабл доиргардида бо А.Раҳмонов ӯ ҳеҷ шикояте накарда будааст.

Қобили зикр аст, ки 1 апрел хадамоти тоҷикии радиои «Озодӣ» бо такя ба гуфтахои Муродҷон Раҳмонов, бародари маҳбус Абдуғаффор Раҳмонов, иттилоъ дода буд, ки ба нишони эътироз алайҳи рафтори дағалонаи корманди муассиса Искандар Исматов нисбати ӯ ва дигар маҳбусон А.Раҳмонов гуруснанишинӣ эълон кардааст.