Кормандони Агентии назорати давлатии молиявӣ ва мубориза бо коррупсияи ҷумҳурӣ дар манзили зист ва дафтари кории собиқ вазири саноати Тоҷикистон Зайд Саидов воқеъ дар кӯчаи Лоиқ Шералӣ кофтуов гузарониданд.

Тавре ба ОИ «Азия-Плюс» Шуҳрат Қудратов, яке аз адвокатҳои Саидов хабар дод, дар манзили зисти бародарони Зайд Саидов низ кофтуков сурат гирифта, адвокат Исҳоқ Табаров дар ин кофтуковҳо ҳузур дорад.

Ба қавли ӯ, то ҳанӯз ба ҳимоятгарон муяясар нашудааст, ки бо зерҳимояи худ дидору мулоқот кунанд. «Аз субҳ ман дар назди бинои Агентӣ қарор дорам, вале барои дидор бо зерҳимояам иҷозат нагирфтаам, ҳарчанд тибқи қонун, ба дастрасии бемамониат бо ӯ ҳуқуқ дорам», - таъкид дошт Ш.Қудратов.

Дар робита ба боздошти собиқ вазири саноати ҶТ Зайд Саидов Агентии назорати давлатии молиявӣ ва мубориза бо коррупсияи ҶТ иттилоия пахш намуд . Роҳбари гурӯҳи ташаббускори таъсиси ҳизби нави «Тоҷикистони нав» Зайд Саидов дарҳол пас аз бозгашт аз Аврупо дар фурудгоҳи пойтахт боздошт шуда, ба Агентии зиддифасод мунтақил гардид.