Дар Агентии назорати маводи нашъаовари назди президенти ҶТ ҷаласаи навбатии Ситоди ҷумҳуриявии амалиёти «Кӯкнор-2013» баргузор гардид.

Бино ба иттилои АНМН, дар кори ҷаласа аъзоёни Ситоди амалиёти «Кӯкнор-2013», Прокурори нақлиёти ҶТ, сардори РВКД дар нақлиёт, сардори раёсати КДАМ ҶТ, муовини аввали сардори КВД «Роҳи оҳани Тоҷикистон», сардори Раёсати назорати сарҳадии қӯшунҳои сарҳадии КДАМ ва сардорони раёсату шӯъбаҳои Агентӣ иштирок намуданд.

«Дар ҷаласа масъалаи мустаҳкам кардани назорат аз болои ҳаракати қатораҳо дар роҳи оҳан, ки аз Ҷумҳурии Тоҷикистон ба дигар кишварҳо ҳаракат менамоянд, муҳокима ва Нақшаи чорабиниҳо оид ба пурзӯр намудани назорати ҳаракати қатораҳои мусофирбари Тоҷикистон бо мақсади пешгирии эҳтимоли қочоқи мухаддирот тасдиқ карда шуд» - изҳор мегардад дар иттилои Агентӣ.

Ба иттилои манбаъ, бо мақсади пешгирии қочоқи маводи нашъадор ба кишварҳои Осиёи Марказӣ ва Федератсияи Россия тавассути қатораҳо пешниҳод шуд, ки бо кормандони КВД «роҳи оҳани Тоҷикистон» корҳои профилактикӣ, пешгирикунанда ва фаҳмондадиҳӣ гузаронида шаванд. Инчунин, ҳамкориҳо бо мақомоти ҳифзи ҳуқуқ ва сохторҳои қудратии кишварҳои Осиёи Марказӣ ва Федератсияи Россия густариш дода шавад.

Зимнан зикр мегардад, ки моҳи августи соли ҷорӣ дар ҷаласаи навбатии Ситоди ҷумҳуриявии амалиёти «Кӯкнор-2013» баррасӣ кардани рафти иҷрои сифатноки чорабиниҳои ба нақша гирифташуда пешбинӣ шудааст.