Кормандони Хадамоти гумруки ҷумҳурӣ аз интиқоли миқдори ниҳоят зиёди маводи мухаддир аз ВМКБ ба вилояти Суғд дар ҳаҷми 123 кило ҷилавгирӣ намуданд, ки аз ин миқдор 101,5 килояшро ҳашиши тар, ҳудуди 19 килояшро ҳашиши қоқ ва наздик ба 3 килояшро героин ташкил медиҳад.

Тавре ба ОИ «Азия-Плюс» сарнозири хадамоти матбуоти Хадамоти гумруки назди ҳукумати ҶТ Нурулло Шарифов хабар дод, тибқи маълумоти пешакӣ ин маводи мухаддир ба ронандаи автомашинаи КамАЗ шаҳрванд А.Холов тааллуқ дошта, ӯ онро дар пинҳонгоҳи автомашина аз ВМКБ ба вилояти Суғд интиқол доданӣ будааст. «Гумонбаршуда боздошт ва айни замон баёнот медиҳад», - гуфт номбурда.

Зимнан зикр гардид, ки аз рӯйи ин далел парвандаи ҷиноӣ боз шуда, тафтиш идома дорад.

Қобили зикр аст, ки соли равон кормандони гумрук аз 14 ҳодисаи муомилоти ғайриқонунии маводи мухаддир ҷилавгирӣ намуда, беш аз 168 кило маводи мухаддиррро ошкор ва мусодира карданд.