Дафтари матбуоти Вазорати корҳои дохилии ҶТ иттилоъ медиҳад, ки кормандони мақомоти корҳои дохилии Вилояти Суғд дар ҷараёни корҳои фаврию ҷустуҷӯйӣ дар шаҳри Хуҷанд гузаронидашуда беш аз 4,4 кг ҳашиш мусодира карданд.

Зикр карда мешавад, ки ҳангоми гузаронидани чорабиниҳои фаврӣ ва ҷустуҷӯйӣ аз ҷониби кормандони РВКД дар вилояти Суғд ҳамчун гумонбар дар ғайриқонунӣ нигоҳ доштани маводи нашъадор шаҳрванди 28- солаи шаҳри Хуҷанд дастгир карда шуда, ҳангоми кофтукови шахсӣ аз ӯ ба миқдори 4 килою 422 грамм маводи нашъадори навъи «ҳашиш» дарёфт ва мусодира карда мешавад. Аз рӯи ин ҳодиса мутобиқи моддаи 200 қисми 4 КҶ ҶТ  парвандаи ҷиноӣ оғоз гардида, тафтиш идома дорад.

Тибқи омори ВКД-и ҶТ, кормандони мақомоти корҳои дохилии Ҷумҳурӣ дар зарфи  нимсолаи аввал аз гардиши ғайриқонунӣ 1 тоннаву 555 кг воситаҳои нашъаовар, аз он ҷумла 152 кг героин,  беш аз 149,5 кг афюн, 669 кг воситаҳои нашъаовари навъи каннабия ва 584 кг ҳашиш мусодира кардаанд. Ба иттилои ВКД-ии Тоҷикистон 41,5%-и ҳаҷми умумии мухадироти мусодиранамудаи тамоми сохторҳои кудратии кишвар рост меояд.