Дар нимаи аввали соли 2013 дар ҷумҳурӣ 690 ҷиноят ба қайд гирифта шудааст, ки аз ҷониби занон содир гардидааст. Нишондоди мазкур назар ба ҳамин давраи соли гузашта 241 адад бештар аст.

Тибқи иттилои раиси Кумитаи кор бо занон ва оилаи назди ҳукумати ҶТ Сумангул Тағоева, ба ин шумор 53 нафар духтарони ноболиғ шомиланд, ки асосан барои қаллобӣ ва дуздӣ дастгир шудаанд.

«Чанде қабл аз Кумитаи мо духтари 19-сола хиҳиши мадад намуд, ки дар нисбати ӯ аз рӯйи далели қаллобӣ парвандаи ҷиноятӣ боз шудааст. Мақомоти тафтишотӣ аллакай баррасии парвандаро анҷом дода, онро ба додгоҳ ирсол кардаанд. Аз рӯйи он моддаҳое, ки мавсуф айбдор карда мешавад, ӯро 12 соли маҳрумият аз озодӣ таҳдид мекунад»,-хабар дод Тағоева.

Ӯ ба он назар аст, ки ин муҳлат барои духтароне, ки аз беақлӣ қонунро вайрон кардаанд, хеле зиёд аст. Аз ин рӯ, Кумита ин духтарро бо вакили мудофеъ таъмин кард ва ҳуқуқшиносони ин сохтор ба ӯ машваратӣ ҳуқуқӣ доданд.