Таҳти раёсати муовини якуми раиси Маҷлиси намояндагони Маҷлиси Олии ҶТ Амиршо Миралиев имрӯз дар шаҳри Душанбе оид ба баррасии ҷараёни иҷрои буҷети давлатӣ дар зарфи 9 моҳи соли равон музокироти парлумонӣ баргузор шуд.

Тавре ба ОИ «Азия-Плюс» котиби матбуотии палатаи поёнии парлумони кишвар Муҳаммадато Султонов хабар дод, зимни ифтитоҳи музокирот Миралиев қайд кард, ки ҳадаф аз баргузории музокироти мазкур таъмини шаффофияти хароҷоти воситаҳои буҷет ва ошкор сохтани камбудиву норасоиҳо дар ин самт мебошад.

«Раиси Кумитаи иқтисод ва молияи МНМО ҶТ Сафаралӣ Раҷабов зимни суханрониаш зикр кард, ки мутобиқи маълумоти расида аз мақомоти ҳифзи ҳуқуқ, дар зарфи 9 моҳи соли 2013 барои ғайриоқилона истифода кардани воситаҳои буҷет 1 ҳазору 192 нафар шахсони масъули вазорату идораҳо ва мақомоти ҳокимияти давлатӣ ба ҷавобгарии маъмурӣ ва молиявӣ ҷалб гардида, 45 нафар мансабдорон аз кор озод карда шудаанд», - гуфт манбаъ.

Ба гуфтаи ӯ, дар назди иштирокчиёни музокирот ҳамчунин намояндагони Вазорати молия, Кумитаи андоз, Хадамоти гумрук ва Палатаи ҳисоби Тоҷикистон низ дар ин бора ибрози назар карданд.