Дар пойтахти Русия – шаҳри Маскав нашъаҷалоби навбатӣ аз Тоҷикистон боздошт шуд. Ӯ изҳор намудааст, ки корманди мақомоти қудратии Тоҷикистон аст.

Ин шахсро кормандони милиса дар кӯчаи Лосевскии шаҳр боздошт намуда, зимни боздошт ӯ густохона рафтор кардааст ва шаҳодатномаи корманди ВКД Тоҷикистонро пешниҳод намуда, кӯшиши халосӣ ва сипас ба таҳиди кормандони милиса пардохтааст.

Аммо кормандони милиса ба таҳдидҳои Тиллоев Наҷибулло Неъматуллоевичи 24-сола аҳамият надода, зимни ҷустуҷӯи чизҳои боздоштшуда аз он беш аз 1 кило маводи мухаддири героинро дарёфт намудаанд. Шаҳодатномаи хизматии Тиллоев гирифта, барои санҷиш фиристода шудааст.

Ҷойи кори Тиллоев алҳол муайян карда мешавад. Танҳо ҳаминаш маълум будааст, ки ӯ дар хонаи ҳамсари русаш, дар кӯчаи Палехскии шаҳри Маскав иқомат доштааст. Барои интиқоли маводи мухаддир дар ҳаҷми ниҳоят зиёд ба Тиллоев ҳукми зиндони абад таҳдид мекунад.