Дар минтақаи шимоли ҷумҳурӣ ба аъзои гурӯҳи ҷиноятпешаи ба истилоҳ «Абрешимчӣ» ҳукм содир шуд.

Ҷинояткорон ҳанӯз тобистони соли ҷорӣ аз ҷониби кормандони Кумитаи давлатии амнияти миллии ҷумҳурӣ боздошт шуда буданд.

Аъзои гурӯҳ Абдумаҷид Халилов, Набиҷон Собиров ва Зоҳирҷон Бобоев мутобиқи моддаи 250-и Кодекси ҷиноии ҷумҳурӣ (Истифодаи зӯроварӣ бо мақсади фоида ба даст овардан бо маслиҳати пешакӣ) гунаҳкор дониста шуда, Бобоев ба 11 сол ва Халилову Собиров ҳар кадоме ба 10 соли зиндон маҳкум карда шуданд.

Дар ҷараёни тафтишот ошкор гардид, ки гурӯҳи ҷиноятпеша ба содир намудани як қатор ҷиноятҳо натанҳо дар вилояти Суғд, балки дар минтақаҳои дигар низ даст дорад. Халилов ва Собиров дар Русия низ нисбати ҳамватанони худ ҷиноятҳо содир намудаанд.

Айни замон кормандони мақомоти ҳифзи ҳуқуқ ҷиҳати дарёфти аъзои дигари гурӯҳи ҷиноятпеша тадбирҳо меандешанд.