Соҳибкори тоҷик Зайд Саидов зимни суханрони ниҳоияш, ки 14-уми декабр анҷом ёфт, аз додгоҳ баррасии одилонаи парвандаашро дархост карда, қайд намудааст, ки 28 соли аз ҷониби айбдоркунандаи давлатӣ талабшударо чун маҳкум сохтан ба марг қабул кардааст. Дар ин бора вакилони дифои Зайд Саидов нақл карданд.

Зайд Саидов ҳамчунин дар рафти баромади ниҳоии худ ёдовар шудааст, ки президенти кишвар Эмомалӣ Раҳмон ҳангоми қасамёдкунӣ ваъда дода буд, тамоми ҳуқуқҳо ва озодиҳои шаҳрвандони Тоҷикистонро ҳимоя кунад. Аз ин рӯ, бо таъкид юа ин суханҳои раисҷумҳур хостааст, қазияаш аз чониби суд одилона баррасӣ шавад. Ӯ ҳамчунин таъкид доштааст, ки ба ҷиноятҳои сангине, ки ӯро айбдор мекунанд, даст надорад, чунки онҳо аслан ба хислати инсонии ӯ номувофиқанд.