Раиси яке аз хоҷагиҳои деҳқонии вилояти Суғд ҳангоми порадиҳӣ ба корманди Агентии назорати давлатии молиявӣ ва мубориза бо коррупсия боздошт шуд.

Тавре ба ОИ «Азия-Плюс» аз Раёсати Агентии мазкур дар вилояти Суғд хабар доданд, чанде қабл раиси яке аз хоҷагиҳои деҳқонии ноҳияи Бобоҷон Ғафуров Ш.Б. зимни порадиҳӣ дар ҳаҷми 3 ҳазор доллари иМА ба корманди Агентӣ бо далели шайъӣ дастгир шудааст.

«Раиси хоҷагӣ ин маблағро ба корманди Агентӣ барои мусбат ҳал шудани масъала ба нафъи худ, яъне ба таъхир гузоштани санҷиши вазъи иқтисодиву молиявии хоҷагии мазкур пешниҳод кардааст», - гуфтанд дар раёсат.

Зимнан зикр гардид, ки аз рӯйи ин далел мутобиқи моддаи 320, қ. 1-и Кодекси ҷиноии ҶТ (Шахсан ё тавассути миёнарав пора додан ба мансабдори давлатӣ) парвандаи ҷиноӣ боз гардида, тафтиш идома дорад.