Дар вилояти Суғд волидайни боз як оила барои монеъ шудан ба гирифтани таҳсилоти ҳатмии умумии асосӣ ба фарзандон ба ҷавобгарӣ кашида шуд.

Тавре ба ОИ «Азия-Плюс» аз Раёсати ВКД ҶТ дар вилояти Суғд хабар доданд, рӯзи панҷшанбеи ҳамин ҳафта нисбат ба сокини ноҳияи Конибодом Ш.Ш. мутобиқи моддаи 164-и Кодекси ҷиноии ҶТ (Монеъ шудан ба гирифтани таҳсилоти ҳатмии умумии асосӣ (нуҳсола) парвандаи ҷиноӣ боз шудааст.

Зимни санҷиш муайян карда шудааст, ки шурӯъ аз моҳи ноябри соли 2013 ӯ дар таҳсили писараш, хонандаи синфи 5-ум ва духтараш, хонандаи синфи 7-уми мактаби таҳсилоти умумӣ монеъа эҷод кардааст.

Бино ба маълумоти Раёсати маорифи вилояти Суғд, соли 2013 дар қаламрави вилоят 28 нафар волидайн барои монеъ шудан ба таҳсили фарзандонашон ба ҷавобгарии ҷиноӣ кашида шуда, ҳамчунин 338 нафар падару модарон барои иҷро накардани уҳдадориҳо дар таълиму тарбияи фарзандон ба ҷавобгарии маъмурӣ ҷалб гардидаанд.