Раиси Ҳизби сотсиал-демократии Тоҷикистон (ҲСДТ) Раҳматилло Зойиров имрӯз аз болои Вазорати корҳои дохилии ҷумҳурӣ ба Прокуратури генералии ЧТ шикоят бурд. Дар аризаи худ пешвои ҲСДТ ВКД-ро ба риоя накардани меъёр ва талаботи қонуни Тоҷикистон «Дар бораи муроҷиати шаҳрвандон» айбдор мекунад.

Раҳматилло Зойиров ба ОИ «Азия-Плюс» дар ин робита изҳор намуд, ки ВКД Тоҷикистон дар баррасии аризаи ӯ оид ба тафтиши ҳодисаҳое, ки дар натиҷаи онҳо ба вохӯриҳояш бо журналистон дар моҳи декабри соли гузашта ва моҳи январи соли ҷорӣ аз ҷониби гурӯҳи занон монеъа эҷод шуд, беэътиноӣ зоҳир намудааст.

«Ман чандин маротиба ба мақомоти корҳи дохилӣ бо дархости ошкор ва ба ҷавобгарӣ ҷалб намудани дастандаркорон ва иҷрокунандагони ин ҳодисаҳо муроҷиат кардам, вале ба муроҷиатҳоям то ба ҳол таваҷҷуҳ зоҳир намешавад», - зикр кард Зойиров.

Ёдрас мекунем, ки ба баргузории вохӯриҳои раиси ҲСДТ бо рӯзноманигорон дар рӯзҳои 10-уми декабри соли гузашта ва 12-уми январи соли равон монеъа эҷод гардид. Он замон як гурӯҳи занон ба толори вохӯрӣ ворид шуда, Зойировро ба кӯшиши ташкили ҷанги навбатии шахрвандӣ дар Тоҷикистон муттаҳам намуданд.