Шабонарӯзи гузашта кормандони Агентии назорати маводи нашъаовари назди Президенти ҶТ дар яке аз кӯчаҳои ноҳияи Фирдавсии пойтахт нуқтаи фурӯши маводи нашъаоварро барҳам доданд.

Бино ба иттилои шуъбаи робита бо ҷомеаи Агентӣ, дар рафти гузаронидани чорабинии оперативӣ-ҷустуҷӯӣ кормандони Агентӣ ду сокини пойтахт – А.А.-и 40-сола ва Н.С.-и 35-соларо боздошт намуданд, ки бо паҳн намудани маводи нашъаовар машғул буданд.

Ба иттилои манбаъ, ҳангоми кофтукови шахсӣ аз онҳо афюн ба миқдори калон мусодира карда шудааст. Тавре тафтиши пешакӣ нишон дод, боздоштшудагон инчунин ба истеъмоли афюн одат кардаанд. Яке аз онҳо, Н.С. дар қайди диспансери наркологӣ қарор доштааст.

Гуфта мешавад, аз тарафи Шуъбаи тафтишоти Агентӣ аз рӯи ин ҳодиса парвандаи ҷиноӣ оғоз гардида, тафтишот идома дорад. Ҳар ду боздоштгардида ба Тавқифгоҳи нигоҳдории муваққатии Агентӣ ворид карда шуданд.