Чанде қабл кормандони Раёсати Агентии назорати маводи нашъаовари назди Президенти ҶТ дар вилояти Суғд аз муомилоти ғайриқонунӣ тақрибан се килограмм маводи нашъаоварро мусодира намуданд.

Бино ба иттилои шуъбаи робита бо ҷомеаи Агентӣ, ҳангоми гузаронидани чорабиниҳои оперативӣ-ҷустуҷӯӣ дар шаҳри Қайроққум халтаи полиэтиленӣ мусодира карда шудааст, ки дар дохили он се адад бастаҳои печонида шуда бо маводи рангаш сабз мавҷуд буд.

«Дар рафти санҷиши пешакӣ кормандони оперативӣ муайян намуданд, ки маводи нашъаовари ҳашиш ба шаҳрванд П.Н. - сокини шаҳри Қайроққум тааллуқ дошта, вазни он се килограммро ташкил менамояд», - гуфта мешавад дар хабари Агентӣ.

Зимнан зикр мегардад, ки айни ҳол аз рӯи ин ҳодиса парвандаи ҷиноӣ оғоз гардида, тафтишот идома дорад.