Рӯзи 28-уми апрел дар Суди иқтисодии вилояти Хатлон мурофиаи додгоҳӣ оид ба баррасии парвандаи корхонаи муштараки «ТоҷикАзот» оғоз мегардад.

Тавре ба «Азия-Плюс» як манбаъ аз Суди иқтисодии вилояти Хатлон хабар дод, ҷонибҳо аз санаи баргузории мурофиаи судӣ огоҳ карда шуда, ба унвони Шӯрои мудирони ширкат ба Маскав низ огоҳиномаи судӣ фиристода шудааст.

Маълумоти мазкурро ҳамчунин дар КМ «ТоҷикАзот» низ тасдиқ намуда, иттилоъ доданд, ки онҳо дар бораи таъини санаи баргузории мурофиаи судӣ огоҳинома гирифтаанд.

Агентии зиддифасоди Тоҷикистон қаблан нисбати молики саҳмияҳои назоратии КМ «ТоҷикАзот», соҳибкори украинӣ Дмитирий Фирташ оид ба харидории ғайриқонунии саҳмияҳо, истифодаи ғайримақсадноки воситаҳо ва иштирок дар муомилоти ғайриқонунии фурӯши таҷҳизот даъво пеш овард. Агентӣ бар ин назар аст, ки муомилоти харидории 75%-и саҳмияҳо ғайриқонунӣ буда, аз ин рӯ, ин саҳмияҳо бояд ба давлат баргардонида шаванд.

Корхонаи муштараки «ТоҷикАзот» моҳи декабри соли 2012 дар заминаи ҶСК «Азот» таъсис дода шуда, нуриҳои азотӣ истеҳсол мекунад.

Бино ба маълумоти Агентии назорати давлатии молиявӣ ва мубориза бо корррупсияи ҶТ, зимни таъсиси корхонаи муштарак Фирташ ба фонди оинномавӣ танҳо як қисмате аз маблағи заруриро пардохтааст. Баъдтар ин воситаҳо барои харидани саҳмияҳои ду корхонаи дигари саноатии Тоҷикистон – ҶСП «Абрешим» дар Хуҷанд ва ҶСП «Гулистон» дар Душанбе масраф шуданд, ки мухолифи қонунгузории Тоҷикистон аст.

Ғайр аз ин, Агентии зиддифасод Фирташро ба он муттаҳам медонад, ки ширкати ӯ дар фурӯши таҷҳизот барои истеҳсоли маводи кимиёвӣ иштирок карда, аммо ҷониби Тоҷикистон, ки дорои 25%-и саҳмияҳои корхона аст, дар бораи фурӯш огаҳ карда нашуда, аз муомилоти анҷомёфта ҷуброн нагирифтааст.

Дмитрий Фирташ ба чоргонаи доротарин шахсони Украина шомил буда, 12-уми марти соли 2012 бо дархости Бюрои федералии тафтишот (ФБР) дар шаҳри Вена боздошт шуд.

Қобли зикр аст, ки то имрӯз Суди иқтисодии Душанбе аз 6 аризаи даъвогии Агентии зиддифасод 5-тоашро баррасӣ намуда, ҳамаи ба фоидаи даъвогар ҳаллу фасл шуданд. Инҳо иборатанд аз парвандаҳо оид ба ширкати «Тоҷикмармар», магазини сарулибоси «Модная точка», корхонаи нассоҷии ҶСП «Гулистон», бинои маркази равобити кории «Соҳибкорон», воқеъ дар кӯчаи Лоиқ Шералии ш. Душанбе ва парвандаи ҶСК «Электроника-М».