Муовини аввали раиси Ҳизби наҳзати исломии Тоҷикистон, вакили палатаи поёнии парлумони ҷумҳурӣ Саидумар Ҳусайнӣ дар шаҳри Хоруғ аз ҷониби шахсони номаълум мавриди ҳамла ва лату кӯб қарор гирифт.

Саидумар Ҳусайнӣ ба «Азия-Плюс» дар ин робита изҳор намуд, ки ӯ ҳамчун вакили Маҷлиси намояндагон рӯзи душанбеи ҳамин ҳафта барои шарҳу тавзеҳи бандҳои асосии паёми президент ба парлумон ба шаҳри Хоруғ рафтааст.

«Ҳамла дар дафтари кории ҲНИТ дар ВМКБ сурат гирифт. Дар натиҷаи ин ҳамла узви Шӯрои сиёсии ҲНИТ Шоҳнаим Каримӣ низ ҷароҳатҳои сабук бардошт», - гуфт Ҳусайнӣ.

Ба гуфтаи ӯ, ҳамлагарон иборат аз 15-20 нафар фарёд мезаданд, ки «дар ВМКБ барои ҲНИТ ҷой нест».

Ҳусайнӣ изҳор мекунад, ки ҳамлагарон асосан кормандони сохторҳои давлатии ВМКБ буда, ӯро, ки вакили парлумон аст, дар ҳукумати ВМКБ ҳатто қабул накардаанд. Дирӯз Ҳусайнӣ сафараш ба ВМКБ-ро қатъ карда, ба Душанбе баргашт.