Кормандони Агентии назорати маводи нашъаовари назди Президенти ҶТ аз муомилоти ғайриқонунӣ 11 килограмм маводи нашъаоварро мусодира намуданд.

Бино ба иттилои шуъбаи робита бо ҷомеаи Агентӣ, ҳангоми гузаронидани чорабиниҳои оперативӣ-ҷустуҷӯӣ дар ноҳияи Ваҳдат автомашинаи тамғаи “Опел-Астра” зери идораи сокини 48-солаи ноҳия боздошт ва зимни кофтукови автомашина аз зери курсии қафо қоғазпеч дарёфт карда шудааст, ки дар он се бастаи селлофанпеч бо маводи хамирмонанд мавҷуд буд.

Ба иттилои манбаъ, кормандони оперативӣ ҳангоми азназаргузаронии хонаи истиқоматии боздоштгардида боз як бастаи селлофаниро ошкор намуданд, ки дар дохили он маводи қаҳваранг мавҷуд буд. Маводи нашъаовар барои ташхис равон карда шуд. Мувофиқи хулосаи экспертизаи судӣ маводи нашъаовари мусодирашуда навъи “афюн” буда, вазни он 10 килограмм 505 граммро ташкил менамояд.

Гуфта мешавад, аз рӯи ин ҳодиса парвандаи ҷиноӣ аз рӯи моддаи 200 қ. 4 (муомилоти ғайриқонунии маводи нашъаовар ё моддаи писхотропӣ бо мақсади фурӯш) оғоз карда шудааст. Боздоштшуда ба Тавқифгоҳи нигоҳдории муваққатии Агентӣ ворид карда шуд.

Зимнан зикр мегардад, ки айни ҳол чораҳои зарурӣ барои муайян ва боздошт намудани ҳамаи шахсоне, ки ба ҷинояти мазкур даст задаанд, андешида шудаанд.