Суди ноҳияи Фирдавсии пойтахт донишҷӯи соли сеюми факултаи менеҷменти Донишгоҳи технологии Тоҷикистон Алидод Карамхудоевро барои лату кӯби ҳамсабақаш 4 ҳазор сомонӣ ҷаримабандӣ кард.

Тавре ба «Азия-Плюс» судяи суди ноҳияи Фирдавсӣ С.Тӯраев хабар дод, донишҷӯ Алидод Карамхудоев дар аудитория назди ҳамсабақон пойафзоли худро бо жемпер тоза кардааст, ки ин рафтор ба ҳамсабақи ӯ Қиматшо Орифшоев хуш наомада, ба ӯ чунин эрод гирифтааст: «Бо ин амалат ту ахлоқу фарҳанги бадахшониёнро паст задӣ».

Ин баҳс ба муноқиша табдил ёфта, бо анҷоми дарсҳо ҳамсабақон дар саҳни донишгоҳ якдигарро лату кӯб мекунанд. Дар натиҷа ҳарду ҷароҳат бардошта, ба бемористон мунтақил шудаанд.

Суди ноҳияи Фирдавсӣ ин ҳодисаро мавриди баррасӣ қарор дода, дар бораи ҷаримабандии Алидод Карамхудоев ба маблағи 4 ҳазор сомонӣ ҳалнома содир намуд.