Шӯрои Маҷлиси намояндагони Маҷлиси Олии Тоҷикистон ҳоло ба омӯзиши муроҷиати расмии вакил, муовини аввали раиси ҲНИТ Саидумар Ҳусайнӣ ба раиси МНМО ҶТ Шукурҷон Зуҳуров оид ба баррасии масъалаи ҳамла ба ӯ аз ҷониби афроди номаълум дар Хоруғ шурӯъ накардааст.

Раиси Кумита оид ба қонунгузорӣ ва ҳуқуқи инсони МНМО ҶТ Маҳмадалӣ Ватанов ба «Азия-Плюс» дар ин робита иттилоъ дод, ки баъди рух додани ин ҳодиса раиси палатаи поёнии парлумон Шукурҷон Зуҳуров бо дархости санҷиши дақиқи ин қазия расман ба Прокурори генералии ҷумҳурӣ Шерхон Салимзода муроҷиат кардааст. «Мо посухи Прокурори генералӣ дар мавриди ин масъаларо интизорем», - гуфт Ватанов.

Ба гуфтаи ӯ, пас аз дастрас шудани посухи Прокуратураи генералӣ Шӯрои палатаи поёнии парлумон ба омӯзишу баррасии муроҷиати расмии вакил С.Ҳусайнӣ ба раиси МНМО ҶТ оғоз мекунад.

Ёдрас мекунем, ки рӯзи 7-уми май вакили Маҷлиси намояндагони Маҷлиси олии ҶТ, муовини аввали раиси ҲНИТ Саидумар Ҳусайнӣ расман ба раиси палатаи поёнии парлумон Шукурҷон Зуҳуров муроҷиат кард , то ки дар ҷаласаи МНМО ҶТ масъалаи марбут ба ҳамлаи содиршуда ба ӯ дар Хоруғ баррасӣ шуда, ҷиҳати тафтиши ин ҳодиса комиссияи парлумонӣ таъсис дода шавад.

Дар муроҷиати худ ба Ш.Зуҳуров ӯ дархост намуд, ки намояндагони ҳукумати ВМКБ барои шарҳи ҳодиса ба Душанбе даъват шуда, ҳамчунин ҷиҳати тафтиши ин ҳодиса ва ба масъулият ҷалб кардани гунаҳкорон ба сохтори дахлдор дархости расмӣ ирсол карда шавад.

Ғайр аз ин, вакил аз раиси палатаи поёнии парлумон дархост кардааст, ки дар ташкили вохӯриҳои ӯ бо интихобкунандагон шароит фароҳам оварда шавад.