Агентии назорати давлатии молиявӣ ва мубориза бо коррупсияи ҷумҳурӣ нисбати омӯзгори литсейи №1-и шаҳри Панҷакент парвандаи ҷиноӣ боз намуд.

Бино ба иттилои сомонаи расмии Агентии мазкур, санаи 15 апрел шаҳрванд Зайтуна Назарова  ба Раёсати Агентӣ бо ариза муроҷиат намуда изҳор доштааст, ки омӯзгори литсейи № 1 шаҳри Панҷакент Исроил Раҷабов бо роҳи фиреб ва сӯистифода ба боварии ӯ даромада, барои дохил намудан ба факултаи ҳуқуқшиносии Донишгоҳи Федератсияи Русия бо супоридани имтиҳонҳо дар Муассисаи давлатии «Маркази барномаҳои байналмилалӣ», аз ӯ  маблағи 8000 доллари ИМА талаб намудаааст.

Ба иттилои манбаъ, худи ҳамон рӯз, дар натиҷаи гузаронидани чорабиниҳои фаврӣ-тафтишотӣ Раҷабов Исроил ҳангоми гирифтани маблағи 8 ҳазор доллари ИМА аз Зайтуна Назарова дастгир карда шуда, маблағ ҳамчун далелҳои шайъи аз ӯ дарёфт ва мусодира шудааст.

Гуфта мешавад, тафтиши парандаи ҷиноӣ нисбати Исроил Раҷабов бо моддаи 247 қисми 4 банди «б»-и КҶ Ҷумҳурии Тоҷикистон (Қаллобӣ) пурра ба анҷом расонида шуда, ба суд ирсол гардидааст.