Ҳафтаи сипаригашта кормандони Раёсати Агентии назорати маводи нашъаовари назди Президенти Ҷумҳурии Тоҷикистон дар ВМКБ оид ба боздошт намудани фурӯшандагони героин ду амалиёт гузарониданд.

Бино ба иттилои шуъбаи робита бо ҷомеаи Агентӣ, баъди дастрас шудани маълумоти оперативӣ, кормандони Раёсат қарор намуданд, ки фурӯшандагони героинро ҳангоми хариду фурӯш дастгир намоянд.

Дар натиҷа ду сокини шаҳри Хоруғ боздошт гардид. Яке аз онҳо соли 2012 барои паҳн намудани маводи нашъаовар суд шуда буд, аммо ҷазои пештар гирифта барояш сабақ нагардид. Ӯ боз ба роҳи каҷ қадам зад.

Муайян гардид, ки ҳар ду фурӯшанда дар ҳеҷ куҷо кор намекунанд.

Ҳангоми кофтукови шахсӣ аз онҳо маводи зардчатоби хокамонанд дарёфт ва мусодира гардид.

Лабораторияи экспертизаи судии Раёсати Агентӣ дар ВМКБ муайян намуд, ки маводи мусодирашуда героин мебошад.

Аз тарафи шуъбаи тафтишотии Агентӣ парвандаи ҷиноӣ оғоз гардид. Боздоштшудагон ба Тавқифгоҳи Нигоҳдории Муваққатии Агентӣ ворид карда шуданд.