Сокини вилояти Суғд барои қасди қатли зани ҳомиладори худ ба 15 соли зиндони низомаш шадид маҳкум шуд.

Аз Суди вилояти Суғд ба «Азия-Плюс» дар ин робита иттилоъ доданд, ки коллегия оид ба парвандаҳои ҷиноятии суди вилоят сокини 47-солаи деҳоти Ориёни ноҳияи Ашт Икром Наимовро дар содир намудани ҷиноят мутобиқи моддаҳои 32, қ. 3 ва 104, қ. 2-и Кодекси ҷиноии ҶТ гунаҳкор эътироф намуда, ӯро ба ин муҳлат аз озодӣ маҳрум кардааст.

Ба иттилои манбаъ, санаи 21-уми апрели соли 2014 маҳкумшуда дар ҳолати мастӣ дар маркази деҳоти Ориён ҳамсари худ, модари се фарзандаш – Г.С.-ро, ки ҳомиладор буд, лату кӯб намуда, бо корд ба ҷисми зан якчанд зарба задааст. Зан ба бемористон мунтақил шуда, табибон ҳаёти ӯ ва кӯдаки батнашро наҷот додаанд.