Мудири филиали №76 Бонки давлатии амонатгузории Ҷумҳурии Тоҷикистон «Амонатбонк» дар минтақаи Рашт Умаралӣ Мирзоев ба азхудкунӣ ва исрофкории воситаҳои ниҳоят зиёди пулӣ гумонбар дониста мешавад.

Бино ба маълумоти маркази матбуоти Агентии назорати давлатии молиявӣ ва мубориза бо коррупсияи ҶТ, зимни фаъолият ба ҳайси мудири ин филиал дар давраи солҳои 2012-2013 У.Мирзоев бо истифода аз ваколатҳои мансабӣ 1 млн. 955 ҳазору 735 сомонӣ маблағро азхуд ва барои эҳтиёҷоти шахсиаш масраф кардааст.

Ба иттилоли манбаъ, Умаралӣ Мирзоев бо мақсади пинҳон намудани маблағҳои пулии тасарруфнамудааш, бо роҳи сохтакории ҳуҷҷатҳои расмӣ ба номи 91 нафар шаҳрвандон ба маблағи умумии 4млн. 359,5 ҳазор сомонӣ қарзи бонкӣ ба расмият даровардаааст, ки гӯё номбурдагон маблағи мазкурро аз хазинаи бонки номбурда бо тариқи нақдӣ гирифта бошанд.

Зимнан зикр мегардад, ки нисбати номбурда мутобиқи моддаҳои 245 (Азонихудкунӣ ё исрофкорӣ) ва 340 (Сохтакории ҳуҷҷатҳо) парвандаи ҷиноӣ боз шуда, тафтиш идома дорад.