Шумори парвандаҳои ҷиноии марбут ба ифротгароӣ, ки соли 2014 аз ҷониби Суди олии кишвар баррасӣ шудаанд, нисбат ба соли 2013 ба таври қобили мулоҳиза афзуд.

Раиси Суди олии ҶТ Нусратулло Абдуллозода зимни нишасти хабарӣ дар ин робита изҳор намуд, ки соли гузашта дар Суди олӣ 25 парвандаи ҷиноӣ нисбати 35 нафари гумонбар ба ифротгароӣ баррасӣ шудааст, ки дар муқоиса бо соли 2013 мутаносибан 10 парванда ва 9 нафар гумонбарон зиёдтар аст.

Дар ҳамин ҳол, Н.Абдуллозода маълумоти интишоршуда аз ҷониби як қатор ВАО дар бораи дар Суди олӣ мавриди баррасӣ қарор доштани парвандаҳо нисбати тарафдорони созмони ифротгарои «Гурӯҳи 24»-ро рад кард. «Суди олӣ чунин парвандаҳоро баррасӣ накарда, имрӯз ҳам дар баррасии Суди олӣ нестанд», - қайд кард Абдуллозода.

Зимнан зикр гардид, ки чунин парвандаҳо шояд дар дигар мақомоти судӣ мавриди баррасӣ қарор гирифта бошанд.