Ҷараёни мазҳабии «Салафия», ки фаъолияташро аввали соли 2009 Суди олии ҷумҳурӣ манъ карда буд, гурӯҳи ифротгаро дар Тоҷикистон эътироф шуд.

Раиси дастгоҳи Суди олии ҶТ Ҳабибулло Амирбекзода ба «Азия-Плюс» дар ин робита иттилоъ дод, ки санаи 8-уми декабри соли 2014 Суди олии ҷумҳурӣ дар ин хусус қарори дахлдор содир намуда, фаъолияти торнамои ҳаракат ва дастрасӣ ба он низ қатъ карда шудааст.

Ба гуфтаи ӯ, ҷонибдорони ҷараёни Салафия мутобиқи моддаи 307, дараҷаи 1-и Кодекси ҷиноии ҶТ (Даъватҳои оммавӣ барои ба амал баровардани фаъолияти ифротгароёна) ба ҷавобгарӣ кашида мешаванд.

Қобили зикр аст, ки ҳукми нахуст нисбати тарафдорони ҷараёни «Салафия» дар Тоҷикистон моҳи октябри соли 2010 аз ҷониби суди ноҳияи Сино содир гардида буд. Бо ин ҳукм 7 нафар – Сироҷиддин Абдураҳмонов, яке аз ҷонибдорони маъруфи ин ҷараён, Киромиддин Абдураҳмонов, писари ӯ ва ҳамчунин Абдураҳмон Абдураҳимов, Муҳаммадраҷаб Наврӯзов, Шаҳобиддин Саидов, Музаффар Файзуллоев ва Икромиддин Юсуфов маҳкум шуда буданд.

Аз соли 2006 бо пешниҳоди Прокуратураи генералии ҶТ 10 гурӯҳҳои ифротгаро, аз ҷумла «Ал-Қоида», Ҳаракати исломии Ӯзбекистон, «Ҷамоати Таблиғ», «Толибон», «Тоҷикистони озод», «Ҳизб-ут Таҳрир» ва ғайра ба феҳристи созмону ҳаракатҳои фаъолияташон дар қаламрави Тоҷикистон манъшуда шомил гардиданд. Санаи 9-уми октябр бо шомил гардидани ҳаракати ҷамъиятии «Гурӯҳи 24» шумори чунин созмонҳо дар рӯйхат афзуд.