Шаби 21 ба 22 январ кормандони Шуъбаи Байниноҳиявии Гурӯҳи Ноҳияҳои Кулоби Раёсати Агентии назорати маводи нашъаовари назди Президенти Ҷумҳурии Тоҷикистон дар вилояти Хатлон амалиёти “таҳвили назоратшавандаи дохилӣ” гузарониданд.

Бино ба иттилои шуъбаи робита бо ҷомеаи Агентӣ, дар марҳилаи ниҳоии амалиёт дар яке аз хонаҳо дар ҳудуди шаҳри Кӯлоб шаҳрванди Ҷумҳурии Исломии Афғонистон – сокини 30-солаи шаҳри Кобул боздошт гардида аз борхалтаи ӯ қариб 10 кило маводи мухаддири ҳашиш дарёфт ва мусодира гардид.

Гуфта мешавад, тафтишот муайян намуд, ки шаҳрванди Афғонистон пешакӣ бо як сокини маҳаллӣ маслиҳат намуда, маводи нашъаоварро ба Кӯлоб барои фурӯш оварда будааст. Гурӯҳи оперативӣ ҳамиштирокчии ҷиноят – сокини 30-соларо муайян ва дастгир намуд. Маълум гашт, ки ӯ қаблан ду маротиба барои дуздии молу мулки ғайр суд шуда будааст.

Зимнан зикр мегардад, ки нисбати ин ҳодиса аз рӯи моддаи 200 қ. 4 - “Муомилоти ғайриқонунии воситаҳои нашъадор ё моддаҳои психотропӣ бо мақсади ба соҳибияти каси дигар додан ба миқдори махсусан калон” парвандаи ҷиноӣ оғоз гардида, боздоштшудагон ҳоло ба Тавқифгоҳи нигоҳдории муваққатии Шуъба ворид карда шудаанд.