Раёсати ВКД Тоҷикистон дар вилояти Хатлон нисбати як узви Ҳизби сотсиал-демократии Тоҷикистон Фирдавс Соҳибназаров, ки аз ҳавзаи якмандатии интихоботии Ҷомӣ номзад ба вакилӣ дар палатаи поёнии парлумон пешбарӣ шуда буд, парвандаи ҷиноӣ боз кард.

Дар ин бора ба «Азия-Плюс» раиси ҲСДТ Раҳматилло Зойиров хабар дода, изҳор намуд, ки ин қазия ангезаи сиёсӣ дорад.

Ба гуфтаи ӯ, Ф.Соҳибназаров, дар содир намудани ҷиноятҳо мутобиқи 4 моддаи Кодекси ҷиноии ҶТ – 245 (Азонихудкунӣ ё исрофкорӣ), 253 (Расонидани зарари молу мулкӣ бо роҳи  фиреб ё суистифодаи боварӣ), 340 (Сохтакорӣ, тайёр кардан ё ба соҳибияти каси дигар додани ҳуҷҷат, мукофоти давлатӣ,  штамп,муҳр ва бланкаҳои қалбакӣ) ва 262 (Ба расмият даровардани (қонунӣ гардонидани)  маблағҳои пулӣ  ё  молу мулки дигари ғайриқонунӣ ба  даст  овардашуда) гумонбар дониста мешавад.

Раҳматилло Зойиров ҳамчунин гуфт, ба сифати адвокат шахсан аз манфиатҳои Фирдавс Соҳибназаров ҳимоят хоҳад кард.