Аз тарафи кормандони Шуъбаи байниноҳиявии Зарафшони Раёсати Агентии назорати маводи нашъаовари назди Президенти ҶТ дар вилояти Суғд дар ҳудуди шаҳри Панҷакент ба гумони даст доштан дар муомилоти ғайриқонунии маводи нашъаовар як сокини маҳаллӣ дастгир карда шуд, ки аз ӯ як бастаи селлофанӣ бо маводи ҷигариранг мусодира гардид.

Бино ба иттилои шуъбаи робита бо ҷомеаи Агентӣ, мутобиқи хулосаи Шуъбаи ташхиси криминалистии ШВКД шаҳри Панҷакент, маводи мусодирашуда афюн буда, вазни он тақрибан 500 граммро ташкил менамояд.

Гуфта мешавад, тафтишоти пешакӣ нишон додааст, дастгиршуда қаблан бо м. 240 КҶ ҶТ «Ташкил ё нигоҳдории қиморхона (казино), мизу автоматҳои бозӣ бо бурди пулӣ» суд шуда, баъди ба озодӣ баромадан, ният доштааст, дар ҳудуди шаҳри Панҷакент бо паҳн намудани афюн машғул шавад. Дар натиҷаи андешидани чораҳои оперативӣ-ҷустуҷӯӣ ҳаммаслаки ӯ – сокини деҳаи Нуристони шаҳри Панҷакент дастгир гардид.

Зимнан зикр мегардад, ки аз рӯи ҳодисаи мазкур аз тарафи Шуъбаи тафтишоти Раёсати Агентӣ бо моддаи 200 қ.2 КҶ ҶТ «Муомилоти ғайриқонунии воситаҳои нашъадор ё моддаҳои психотропӣ бо мақсади ба соҳибияти каси дигар додан ба миқдори начандон калон» парвандаи ҷиноӣ оғоз гардида, тафтишот давом дорад ва боздоштшудагон ба тавқифгоҳи нигоҳдории муваққатии Раёсати Агентӣ ворид карда шудаанд.