Аз тарафи кормандони Раёсати Агентии назорати маводи нашъаовари назди Президенти Ҷумҳурии Тоҷикистон дар ВМКБ дар ноҳияи Дарвоз як нафар шаҳрванди Афғонистон барои даст доштан ба муомилоти ғайриқонунии маводи нашъаовар дастгир гардид.

Бино ба иттилои маркази робита бо ҷомеаи Агентӣ, дар рафти гузаронидани чорабиниҳои муштараки оперативӣ-ҷустуҷӯӣ аз тарафи Раёсати Агентӣ дар вилояти Бадахшон ва Раёсати КДАМ ҶТ дар вилояти Бадахшон дар деҳаи Тегмайи ҷамоати Вишхарви ноҳияи Дарвоз ҳамчун гумонбар дар қочоқи маводи нашъаовар як нафар сокини 20-солаи вулусволии Моҳи Майи вилояти Бадахшони Афғонистон дастгир гардида, аз ӯ афюн бо вазни зиёда аз 6 килограмм ва бангдонаи каннабис бо вазни тахминан 6 килограмм дарёфт ва мусодира карда шуд.

Гуфта мешавад, нисбати ин ҳодиса аз рӯи якчанд моддаи Кодекси ҷиноятии ҶТ – м. 200 қ. 3 - “Муомилоти ғайриқонунии воситаҳои нашъадор ё моддаҳои психотропӣ бо мақсади ба соҳибияти каси дигар додан ба миқдори калон”, м. 289. “Қочоқ” ва м. 335. “Ғайриқонунӣ гузаштан аз Сарҳади давлатии Ҷумҳурии Тоҷикистон” парвандаи ҷиноӣ оғоз гардида, айни ҳол барои муайян намудани шаҳрвандони Тоҷикистон, ки ба ҷинояти мазкур алоқамандӣ доранд, чорабиниҳои оперативӣ гузаронида мешаванд ва боздоштшуда ҳоло дар тавқифгоҳи муваққатии раёсати Агентӣ қарор дорад.

Зимнан зикр мегардад, ки инчунин, аз тарафи кормандони Раёсати Агентӣ дар вилояти Хатлон дар рафти гузаронидани чорабиниҳои оперативӣ панҷ нафар сокинони вилоят дастгир гардида, ҳангоми кофтукови шахсӣ аз онҳо тақрибан 2 кг афюн ёфт ва мусодира гардид.

Ҳамин тариқ, фаъолияти боз як гурӯҳи ҷиноятпеша, ки муддати тӯлонӣ бо паҳн намудани маводи нашъаовар дар ноҳияҳои наздисарҳадӣ машғул буданд, қатъ карда шуда, боздоштшудагон ҳоло дар тавқифгоҳи нигоҳдории муваққатии раёсати Агентӣ қарор доранд.