Дар шаҳри Душанбе аз 3 то 5 июн баргузории ҷаласаи вазирони корҳои дохилии кишварҳои узви Созмони ҳамкории Шанхай (СҲШ) дар назар аст.

Тавре ба «Азия-Плюс» як манбаъ аз ҳукумати ҷумҳурӣ дар ин робита иттилоъ дод, дар ҷаласа масоили ҳамоҳангсозии фаъолияти мақомоти корҳои дохилии кишварҳои узви Созмон дар мубориза алайҳи ҷинояткории фаромиллӣ ва муомилоти ғайриқонунии маводи мухаддир ва аслиҳа мавриди баррасӣ қарор хоҳанд гирифт.

Дар назар аст, ки дар ҳошияи сафар ба Тоҷикистон вазирони корҳои дохилии давлатҳои аъзои Созмонро президенти мамлакат Эмомалӣ Раҳмон ба ҳузур мепазирад.

Зимнан зикр гардид, ки вазирони корҳои дохилии кишварҳои узви СҲШ ҳамчунин ҷараёни баргузории тамринҳои зиддитеррористии муштараки ВКД Тоҷикистон ва Вазорати амнияти ҷамъиятии Чинро низ мушоҳида хоҳанд кард, ки дар маркази таълимии «Магов»-и воқеъ дар шаҳри Ваҳдат доир хоҳад гардид.