Суди Останикинои шаҳри Маскав оид ба парвандаи ҷиноӣ нисбати шаҳрвандони Тоҷикистон - Сафаралӣ Раҷабови 26-сола, Алихон Икромови 21-сола ва Бобоҷон Юлдошеви 24-сола ҳукм содир намуд.

Нашрияи Москва инфо дар ин робита иттилоъ медиҳад, ки Раҷабов, Икромов ва Юлдошев дар ҳайати гурӯҳи фурӯшандагони маводи мухаддир тариқи ба пинҳонгоҳҳо гузоштани героин, ба фурӯш ва паҳн кардани он машғул будаанд.

Гуфта мешавад, санаи 9 апрели соли гузашта номбаршудагон боздошт гардида, аз онҳо беш аз 2,5 кило маводи мухаддири героини барои фурӯш омодашуда мусодира шудааст.

Нашрия менависад, ғайр аз ин, Раҷабов ҳамроҳ бо дигар аъзои гурӯҳи муташаккил, ки парвандаи ҷиноӣ нисбати онҳо дар истеҳсолоти ҷудогона қарор дода шудааст, ғайриқонунӣ миқдори ниҳоят зиёди маводи мухаддирро барои фурӯш омода кардааст.

Зимнан зикр мегардад, ки суд Раҷабовро ба 13 соли зиндон ва Икромову Юлдошев ҳар кадомеро ба 10 соли зиндони низомаш шадид маҳкум кардааст.