Суди ноҳияи Исмоили Сомонӣ сокини 25-солаи пойтахт Амирбек Исоевро барои зиёфати дӯстонаш дар қаҳвахона бо торт ба муносибати ҷашни зодрӯзаш ба маблағи 4 ҳазор сомонӣ ҷарима кард.

Суд Исоевро дар риоя накардани моддаи 8-и қонун «Дар бораи танзими анъана ва ҷашну маросимҳои миллии ҶТ» гунаҳкор донист, ки мутобиқи ин қонун шаҳрвандон зодрӯзашонро бояд дар доираи оилаашон ҷашн гиранд.

Парванда нисбати Исоеви бекорро прокуратура бар асоси нашри аксҳо аз ин ҷашн дар саҳифаи Facebook боз намуд. Дар ин аксҳо Исоеву дӯстонаш ва торт тасвир ёфтаанд. Дар ин нашр ӯ аз дӯстонаш барои иштирок дар ин ҷашн миннатдорӣ изҳор мекунад.

Дар мурофиаи судӣ Исоев изҳор намуд, ки ин воқеъа як тасодуфе буда, ӯву духтари шиносаш тортхарӣ рафтаанд ва сипас ба қаҳвахона даромада, дар он ҷо бо дӯстонашон вохӯрдаанд. Пешхизмате, ки ба онҳо хизмат расонида буд, низ тасдиқ кардааст, ки ба унвони судшаванда ҳеҷ табрикотеро нашунидааст.

Сарфи назар аз ин, суд нисбати соҳибҷашн ҳукми айбдорӣ содир намуда, ӯро ба пардохти ҷарима уҳдадор кард. Исоев изҳор доштааст, ки айни замон барои пардохти маблағи ҷарима имкон надорад ва аз болои ин қарори суд ба зинаҳои болоӣ шикоят бурданист.