Мақомоти ҳифзӣ ҳуқуқи ҷумҳурӣ як зани 20-солаи сокини ноҳияи Панҷро дар содир намудани амали роҳзанӣ гумонбар медонанд.

Дафтари матбуоти ВКД Тоҷикистон дар шарҳи ин ҳодиса менависад, дар натиҷаи гузаронидани чорабиниҳои оперативӣ-ҷустуҷӯӣ аз ҷониби кормандони милитсия зани 20-солаи сокини ноҳияи Панҷ бо гумони роҳзанӣ дастгир гардид.

«Гумонбаршуда, санаи 28 август дар бозори “Ҳоҷи-Шариф”-и шаҳри Қӯрғонтеппа бо мақсади ба даст овардани молу мулки ғайр ба дӯкони соҳибкор, зани 36-солаи сокини шаҳри Қӯрғонтеппа ворид шуда, бо таҳдиди корд аз ӯ якчанд намуди либосҳоро ба маблағи 400-сомонӣ гирифта, аз ҷойи ҳодиса ғайб задааст», - омадааст дар хабари ВКД.

Зимнан зикр мегардад, ки нисбати дастгиршуда бо моддаи 249 Кодекси ҷиноятии Ҷумҳурии Тоҷикистон (Роҳзанӣ) парвандаи ҷиноятӣ оғоз гардида, тафтишот дар ин самт идома дорад.