Кормандони Шуъбаи ВКД Тоҷикистон дар ноҳияи Рӯдакӣ сокинони маҳаллӣ, ҷавонони 17 ва 18-соларо ба гумони даст доштан дар ҳодисаҳои дуздӣ боздошт намудаанд.

Бино ба маълумоти маркази матбуоти ВКД ҶТ, рӯзи 12 октябр боздоштшудагон бо роҳи пинҳонӣ вориди хонаи истиқоматии сокини 37-солаи маҳаллӣ шуда, аз он ҷо маблағи пулӣ дар ҳаҷми 2 ҳазор доллари ИМА ва ҷавоҳироти тиллоӣ ҷамъ ба маблағи 140 ҳазор сомониро дуздида, аз ҷойи ҳодиса ғайб задаанд.

Гуфта мешавад, муайян карда шудааст, ки гумонбаршудаҳо қаблан низ бо ҳамин роҳ аз манзили истиқоматии зани 28-солаи сокини ноҳияи Рӯдакӣ маблағи пулӣ дар ҳаҷми 2 ҳазор доллари ИМА ва ҷавоҳироти тиллоӣ ҷамъ ба маблағи 15 ҳазор сомониро дуздида, аз ҷойи ҳодиса ғайб задаанд.

Зимнан зикр мегардад, ки нисбати далелҳои мазкур парвандаи ҷиноятӣ оғоз гардида, тафтишот дар ин самт идома дорад.