Субҳи рӯзи 10 ноябр муҳоҷирон аз Тоҷикистон Рустам Назаров ва Заррина Юнусова, волидони тифли панҷмоҳаи тоҷик Умаралӣ Назаровро, ки дар бемористони шаҳри Санкт-Петербург фавтида буд, кормандони пулис ба озмоишгоҳи кимиёвӣ-токсикологии шаҳр оварда, дар он ҷо талош варзидаанд онҳоро ба супурдани ташхиси хун маҷбур намоянд.

Танҳо ба туфайли дахолати адвокатҳои ҷабрдидагон, ки дар фурсати кӯтоҳ ба озмоишгоҳ ҳозир шудаанд, муясясар гардидааст, ки аз ин амал пешгирӣ шавад.

Ҷониби ҳимояи ҷабрдидагон ба ин гумон аст, ки мақомоти ҳифзи ҳуқуқ айни замон кӯшиш ба харҷ медиҳанд, ки бо ҳар гуна тасдиқе дар марги тифл волидонашро гунаҳкор созанд.

Ёдрас мекунем, ки кӯдаки 5-моҳаи муҳоҷирон аз Тоҷикистон Заррина Юнусова ва Рустам Назаров - Умаралӣ Назаров ҳангоми рейди кормандони Хадамоти федералии муҳоҷират субҳи рӯзи 13 октябр аз модараш гирифта шуда, баъди чанд соат аз ҷониби кормандони пулис ба бемористони кӯдаконаи ба номи Симбалин фиристода шуд ва нимашаби ҳамон рӯз дар ин бемористон фавтид.

Ҳамчунин қаблан пайвандони Умаралии панҷмоҳа изҳор доштанд, ки зери фишори муфаттишон қарор доранд . Рустам Назаров, падари Умаралӣ Назаров ба расонаҳои русӣ гуфтааст, ки муфаттишон ба оилаи онҳо фишор оварда, ба расонаҳо иттилое паҳн карда истодаанд, гӯё дар марги тифламон худи мо гунаҳкор бошем. Ҳатто эҳтимол дорад, ки онҳоро ба куштани тифл муттаҳам мекунанд.