Зимни баргузории чорабиниҳои фаврӣ-ҷустуҷӯӣ кормандони милиса рӯзи 11 январ ба гумони даст доштан дар муомилоти ғайриқонунии маводи мухаддир ду нафар сокинони 40 ва 41-солаи ноҳияи Шӯроободро боздошт намуданд.

Бино ба иттилои маркази матбуоти ВКД Тоҷикистон, дар вақти азназаргузаронии автомашинаи шахсии марди 40-сола, тамғаи “Мусо” аз дохили бағоҷ 7-киллою 246-грамм маводи нашъадори навъи афюн дарёфт ва мусодира карда шудааст.

Гуфта мешавад, рӯзи дигар дар натиҷаи гузаронидани чорабиниҳои оперативӣ-ҷустуҷӯӣ аз ҷониби кормандони ШВКД дар ноҳияи Шуғнони ВМКБ, шаҳрванди Афғонистон, марди 24-сола, истиқоматкунандаи Қарияи Димурғони вулусволии Шуғнон ҳамчун гумонбар дар ғайриқонунӣ нигоҳ доштани маводи нашъадор дастгир гардида, дар вақти кофтукови шахсӣ аз дохили борхалтаи номбурда 11-килою 126-грамм маводи нашъадори ҳашиш дарёфт ва мусодира гардидааст.

Зимнан зикр мегардад, ки нисбати далелҳои мазкур парвандаҳои ҷиноятӣ оғоз гардида, тафтишот дар ин самт идома дорад.