Кормандони мақомоти корҳои дохилии ҷумҳурӣ аз оғози соли равон беш аз 300 кило маводи мухаддирро аз муомилоти ғайриқонунӣ мусодира карданд.

Зимни вохӯрии имрӯза бо журналистон вазири корҳои дохилии ҷумҳурӣ Рамазон Раҳимзода дар ин робита изҳор намуд, ки соли гузашта дар қаламрави Тоҷикистон аз ҷониби тамоми сохторҳои қудратии кишвар 4 тоннаву 676 кило маводи мухаддир аз муомилоти ғайриқонунӣ мусодира шуда, 2 тонна аз ин ҳаҷм ба ҳиссаи кормандони ВКД рост меояд.

Бино ба маълумоти маркази матбуоти ВКД Тоҷикистон, давоми рӯзҳои истироҳати ҳафтаи сипаришуда дар ҷумҳурӣ зиёда аз 30 кило маводи мухаддир дарёфт ва мусодира шудааст.

Гуфта мешавад, дар ноҳияи Ҷиргатол рӯзи 23 январ аз сокини маҳаллӣ ва меҳмони ӯ аз Қирғизистон беш аз 17 кило маводи мухаддири ҳашиш дарёфт ва мусодира шудааст.

Ҳамчунин рӯзи 24 январ дар Вилояти Мухтори Кӯҳистони Бадахшон барои ғайриқонунӣ нигоҳ доштани 13 кило ҳашиш шаҳрванди Қирғизистон ва се нафар сокинони ноҳияи Шуғнон боздошт шудаанд.