Суди олии Русия ҳукми суди ҳарбии ҳавзаи Қафқози Шимолиро оид ба гунаҳкор эътироф кардани зодаи Тоҷикистон Хуршедҷон Миҳтоҷов ба иттиҳоми ҷалби русиягиҳо ба сафи гурӯҳҳои ҷиноятпеша дар Сурия ва ҳамчунин ғайриқонунӣ нигаҳдории маводи мухаддир бетағйир боқӣ гузошт.

Нашрияи Коммерсантъ дар ин робита менависад, суд Миҳтоҷовро ба 7 соли зиндони низомаш умумӣ маҳкум кардааст.

Ба иттилои нашрия, зимни мурофиа судшаванда гуноҳашро рад карда, иброз доштааст, ки ӯ танҳо ба як зан аз Ставропол нияти издивоҷ дошта, барои наворбардории филми мустанад «доир ба вазъи бадбахтонаи мардуми Сурия» ба сафар баромаданӣ будааст.

Тибқи маълумоти хабаргузории РИА Новости , дар мурофиа айбдоршаванда изҳор кардааст, ки ба афкору ғояҳои тундгароӣ ҷонибдор нест ва гузашта аз ин, ӯ маводи мухаддир истехмол намекунад ва мақсади ӯ издивоҷ кардан бо духтар будааст.

Ба қавли айбдоршаванда, ӯ ҳақиқатан ҳам ба Сурия рафтанӣ будааст, вале барои «наворбардории филми мустанад оид ба вазъи фалокатбори мардум», на барои пайвастан ба сафҳои ҷангиён.

Хабарнигори РИА Новости иттилоъ додааст, ки сарфи назар аз мукотибааш бо духтар бо забони русӣ, ӯ баёноташро бо забони тоҷикӣ дода, зимни мурофиа забони русиро «фаромӯш кардааст».

Бино ба маълумоти мақомоти тафтишот, зимни мукотиба бо як духтар аз вилояти Ставропол дар шабакаҳои иҷтимоӣ ва гуфтугӯҳои телефонӣ, айбдоршаванда ӯро ба анҷоми маросими никоҳи мусалмонӣ бо худаш ва сафар ба Сурия моил мекардааст.

Айбдоршавандаро ҳангоми тариқи ҳавопаймо ба Ставропол омадан боздошт ва ҳамчунин зимни кофтуков аз ӯ маводи мухаддири героин дарёфт ва мусодира шудааст.

Суд Миҳтоҷовро дар содир намудани ҷиноятҳо мутобиқи моддаҳои 205.1 (мусоидат ба фаъолияти террористӣ) ва 228, қ.2 (ғайриқонунӣ нигаҳдорӣ ва интиқоли маводи нашъаовар дар ҳаҷми ниҳоят зиёд бидуни мақсади фурӯш)-и Кодекси ҷиноии Русия гунаҳкор эътироф намудааст.