Бо қарори суди ноҳияи Исмоили Сомонии пойтахт овозхони маъруфи эстрадаи тоҷик Остон Азизов барои риоя накардани меъёрҳои қонун «Дар бораи танзими анъана ва ҷашну маросимҳои миллӣ» ба маблағи 4 ҳазор сомонӣ ҷарима шуд.

Бино ба маълумоти мунташиркардаи суд, моҳи августи соли гузашта сароянда бидуни бастани шартнома дар тарабхонаи «Жасмин»-и ноҳияи Варзоб дар тӯй хизмат кардааст.

Зимни суханронӣ дар суд овозхон изҳор доштааст, ки ӯ дар тӯй меҳмон буда, ҳамчун тӯҳфа ба навхонадорон ду-се суруд хондааст ва бо ҳамин сабаб шартнома набастааст.

Бо баррасии нишондоди якчанд шоҳидон, суд қарор кардааст, ки овозхон ба маблағи дар боло зикргардида ҷарима шавад.