Кормандони милитсия рӯзи 7 март марди 25-солаи сокини ноҳияи Шаҳринавро ба гумони тамаъҷӯӣ дастгир карданд.

Дафтари матбуоти ВКД Тоҷикистон дар шарҳи ин маълумот менависад, муайян карда шудааст, ки гумонбаршуда моҳи январи соли 2015 дар хонаи истиқоматии зани 46-солаи сокини шаҳри Душанбе муддати 10 шабонарӯз корҳои таъмирӣ анҷом дода, оид ба шахсияти шавҳар ва фарзандони ноболиғи соҳибхона маълумот пайдо мекунад.

Гуфта мешавад, сипас, моҳи феврали соли 2016 бо мақсади тамаъҷӯӣ якчанд маротиба аз рақамҳои гуногун ба телефони мобилии зани 46-сола занг зада, худро муаррифӣ намекунад ва бо таҳдиди куштор ва расонидани зарари ҷисмонӣ нисбати фарзандони ноболиғаш аз ӯ 6 ҳазору 500 доллари амрикоӣ талаб намудааст.

Зимнан зикр мегардад, ки нисбати далели мазкур парвандаи ҷиноятӣ оғоз гардида, тафтишот идома дорад.