Прокуратураи вилояти Суғд нисбати 6 имомхатиби масҷидҳои ҷомеъ парвандаи ҷиноӣ боз намуда, онҳо боздошт шудаанд. Имомхатибон ба узвият дар ҳизбу ҳаракатҳои мамнӯъ гумонбар дониста мешаванд.

Бино ба иттилои Радиои Озодӣ бо истинод ба як манбаъ дар мақомоти рокуратураи вилоят, тафтиши ин парвандаро шуъбаи мубориза алайҳи ҷиноятҳои созмонёфтаи прокуратура пеш мебарад ва ба далели ворид нашудани халал ба тафтиш, наметавонанд ҷузъиёти парвандаро ошкор бикунанд.

Ин ходимони динро ҳудуди як моҳ пеш мақомоти пулис дастгир карда, ду имомхатиб аз Хуҷанд, дуи дигар аз Конибодом ва якнафарӣ аз ноҳияи Бобоҷон Ғафуров ва шаҳри Гулистон (Қайроққум) будаанд.

Айни замон ба Радиои Озодӣ ному насаби се тан аз онҳо - Мақсуд Урунов, Абдуҷамил Юсупов ва Сулаймон Болтуев маълум будаанд, ки имомхатибони масҷидҳои ҷомеи ноҳияҳои Конибодом, Бобоҷон Ғафуров ва Қайроққум мебошанд.

Гуфта мешавад, агар гуноҳи имомхатибони боздоштшуда дар мурофиаи судӣ исбот шавад, ба онҳо ҷарима дар ҳаҷми аз 1 то 2 ҳазор нишондиҳанда барои ҳисоб ё маҳрумият аз озодӣ ба муҳлати аз 3 то 5 сол таҳдид мекунад.