Нисбати роҳбари маркази технологияҳои иттилоотӣ ва коммуникатсионии дастгоҳи иҷроияи президенти Тоҷикистон Қадамҷон Сафизодаи 34-сола, ки ҳанӯз 3 апрели соли ҷорӣ боздошт шуда будааст, суди пойтахт бо дастрасии моддаи 259, қ. 2-и Кодекси ҷиноии ҶТ (Соҳибкории ғайриқонунӣ дар ҳайати гурӯҳи муташаккил) парвандаи ҷиноӣ боз намудааст. Дар ин бора ба «Азия-Плюс» аз Шӯрои адлияи Тоҷикистон хабар доданд.

Бино ба иттилои манбаъ, аз рӯи дигар моддаҳои Кодекси ҷиноии ҶТ нисбати боздоштшуда парванда боз нашудааст.

Мутобиқи меъёрҳои моддаҳои амалкунандаи КҶ ҶТ, дар сурати аз ҷониби суд собит шудани гуноҳи Қ.Сафизода, ӯ дар ҳаҷми 12 ҳазор сомонӣ ҷаримабандӣ ё ба муҳлати аз 3 то 5 сол аз озодӣ маҳрум шуда метавонад.

Қаблан иттилоъ дода будем , ки Қадамҷон Сафизода аз ҷониби кормандони милитсия ба гумони порагирӣ боздошт шудааст.

Бо амри президенти Тоҷикистон аз 4 апрел Сафизода Қадамҷон Исмат аз вазифаи мудири маркази технологияҳои иттилоотӣ ва коммуникатсионии дастгоҳи иҷроияи президент бидуни зикри сабаб озод карда шудааст.