Вазорати корҳои дохилии Тоҷикистон иттилоъ медиҳад, ки гумонбари асосӣ ба қатли 6 нафар дар вилояти Самараи Русия изҳор доштааст, ки ӯ дар содир намудани ин ҷиноят гунаҳкор нест.

Дар маълумоти дар ин робита интишоршуда дар сомонаи ВКд Тоҷикистон гуфта мешавад, ҳафтаи равон шаҳрванди Тоҷикистон Маҳмадалӣ Аҳмадов ба Вазорат ҳозир шуда, иброз доштааст, ки воситаҳои ахбори Русия ӯро дар куштори оилаи Андрей Гошта, корманди мақомоти корҳои дохилии Русия дар вилояти Самара гумонбар донистаанд.

Номбурда таъкид намудааст, ки ӯ дар ин ҷинояти вазнин даст надорад ва барои гуфтаҳои худро собит намудан, ӯ ба ин кишвар бармегардад.

Ҳамчунин зикр мегардад, ки бинобар сабаби дар ҷустуҷӯ қарор надоштан ва аз мақомоти Русия ворид нагардидани дархост оид ба дастгир кардани Маҳмадалӣ Аҳмадов, ӯ тавассути нақлиёти ҳавоӣ ба Русия баргаштааст.

Қаблан Сарраёсати Қушӯнҳои сарҳадии КДАМ Тоҷикистон маълумот дар бораи боздошти гумонбари асосӣ дар куштори 6 нафар дар ноҳияи Сизрани вилояти Самараи Русия Маҳмадалӣ Маҳмадалӣ Маҳмадовро дар марзи Тоҷикистону Афғонистон рад кард.

Пеш аз ин ВАО-и Русия  бо истинод ба сардори мақомоти пулиси вилояти Самара Сергей Солодовников  хабар дода буданд , ки гумонбари асосӣ ба қатли собиқ сардор пулиси Сизран полковник Андрей Гошт ва аъзои оилаи ӯ Маҳмадалӣ Аҳмадов зимни кӯшиши убури ғайриқонунии марзи Тоҷикистону Афғонистон боздошт шудааст.