Зимни як амалиёти муваффақонаи муштараки марзбонони Сарраёсати Қушӯнҳои сарҳадии КДАМ Тоҷикистон ва Агентии назорати маводи нашъаовари назди президенти ҷумҳурӣ дар ноҳияи Дарвози ВМКБ, ки бо Афғонистон ҳаммарз аст, миқдори зиёди маводи мухаддир мусодира шуд.

Котиби матбуотии Сарраёсати Қушӯнҳои сарҳадии ҷумҳурӣ Муҳаммад Улуғхоҷаев дар ин робита иттилоъ дод, ки барои даст доштан ба интиқоли маводи мухаддир аз Афғонистон ба қаламрави ВМКБ сокини 23-солаи Афғонистон Абдулбоқӣ валади Ҳоҷӣ дастгир шуда, аз ӯ 9 кило маводи мухаддири афюн ва 9 кило маводи мухаддири ҳашиш дарёфт ва мусодира гардидааст.

Зимнан зикр гардид, ки нисбати боздоштшуда парвандаи ҷиноӣ оғоз гардида, тафтишот дар ин самт идома дорад.