Ҳамаи 13 нафар аъзои маҳкумшудаи Ҳизби фаъолияташ мамнӯъи наҳзати исломии Тоҷикистон рӯзи 10 июн ба тавқифгоҳҳои тафтишотӣ (СИЗО)-и КДАМ ва Вазорати адлияи Тоҷикистон гузаронида шуданд.

Муовинони раиси ҳизб Саидумар Ҳусайнӣ ва Маҳмадалии Ҳайит, ки ба ҳукми ҳабси абад маҳкум шудаанд, то охири умр дар ҳуҷраи махсуси барои ин гуна маҳбусон пешбинишудаи Вазорати адлия қарор хоҳанд дошт.

Савринисо Ҷӯраева, ҳамсари Маҳмадалии Ҳайит ба «Азия-Плюс» хабар дод, ки адвокат Ҷамшед Ёров рӯзи 14 июн барои вохӯрӣ бо М.Ҳайит аз Суди олӣ иҷозатнома гирифта, вале адвокатро ба вохӯрӣ роҳ надодаву гуфтаанд, ки барои ин ҳеҷ зарурате ҷой надорад.

«Намояндагони тавқифгоҳи тафтишотии Вазорати адлия ҳамчунин гуфтаанд, М.Ҳайит аллакай бо ҳукми Суди олӣ шинос шуда,рӯзи 10 июн аз болои он шикояти кассатсионӣ пешниҳод кардааст», - гуфт С.Ҷӯраева бо такя ба суханони адвокат.

Ёдрас мекунем, ки  Суди олии Тоҷикистон санаи 2 июн нисбати фаъолони боздоштшудаи ҲНИТ  ҳукм содир намуда , муовинони раиси ҳизб Саидумар Ҳусайнӣ ва Маҳмадалии Ҳайитро ба ҳабси абад маҳкум кард.